الكوخ – alku5
دة مش متحف انتيكات
دة مكان في الزمالك ونقدر نقول انه المقر الرسمي للروقان 🥰😍
مجرد ما تدخل الكوخ هتحس براحة رهيبة 😇 مكان هادي و بسيط، تستمتع بالبساطة بتاعت زمان .. فعلا كانك سافرت دهب او شرم تغيير جو
الكوخ عبارة عن مطعم .. بس مختلف عن أي مطعم تاني ممكن تكون دخلته في حياتك قبل كدة
لدرجة ان في شخصيات كتير مشهورة و VIP من دول كتير بيروحوا الكوخ مخصوص من كتر ما هو مشهور و معروف حتى برة مصر
القعدة و الديكورات و جو المكان نفسه فيه تفاصيل كتير بسيطة بس كلها مرتبطة بذكرايتنا الجميلة، و في كل ركن هتلاقي صورة او كلمة ترسم على وشك ابتسامة و تخلي مودك حلو
المنيو اللي الكوخ بيقدمها مميزة جدا .. يعني مثلا هما مشهورين بالفطار مع قعدة البلكونة سواء بقى هتفطر فطار شرقي "فول طعمية، بيض، بطاطس" أو فطير مشلتت مع جبنة بالطماطم أو جبنة قديمة مع عسل اسود و طحينة
و الغدا كمان عندهم مختلف و مميز جدا، يعني مثلا بيعملوا حواوشي بالرانش صوص .. اختراع من عالم اخر .. بس جامد جدا
بحب كمان طاسة السجق و الكبدة اوي عندهم و في أصناف تانية كتير زي المشويات و المكرونات و الساندوتشات بأنواعها .. فا تأكد انك هتلاقي في المنيو اختيارات كتير مناسبة لذوقك
و مفيش أحلى من انك تقعد تشرب فنجان قهوة في البلكونة وسط الزرع و قصادك ڤيو بيطل على شوارع الزمالك اللي كلها أشجار 🌳🌳
أسعار الاكل هناك متوسطة و عادية جدا، يعني ايا كان اللي في جيبك هتروح تغير جو و تنبسط و تتصور في المكان
قبل ما تقعد في مكان خد لفة الاول و شوف تحب القعدة العربي ولا دوار العمدة ولا البلكونة
و على فكرة نفس العمارة اللي فيها الكوخ .. كان ساكن فيها الفنان الكوميدي المحبوب اسماعيل يس الله يرحمه .. عشان كدة العمارة دي مشهورة بعمارة اسماعيل يس
رقم التليفون
01026514158
العنوان
الزمالك، شارع ٢٦ يوليو، عمارة ١٣٨، تاني عمارة بعد ساقية الصاوي عند موقف الاوتوبيس .. اقرب محطة مترو صفاء حجازي في الزمالك
و ليهم فرع تاني في وسط البلد، ورا العبد للحلويات
